SESELEH TETUEK KONOTATIF LAN DENOTATIF GENDING RARE MADE CENIK

Abstract

Gending rare madue akeh kalewihan sane prsida kaanggen sasuluh ritatkala iraga nyalanang swadarma. Tetilik puniki matatujon nlatarang ngeninin indik: seseleh tetuek konotatif lan tetuek denotatif gending rare sane mamurda Made Cenik, antuk nilikin tetuek tersirat sane wenten ring gending rare puniki. Jejering tetilikan inggih punika gending rare sane mamurda Made Cenik. Panandang tetilik inggih punika tetuek konotatif lan tetuek denotatif. Tetilikan puniki ngranjing ring tetilikan deskriptif kualitatif. Kramaning mupulang data ring tetilikan puniki kaanggen kramaning piranti data marupa tabel seseleh tetuek denotatif lan tetuek konotatif. Pikolih tetilikan ring gending rare sane mamurda Made Cenik sakadi: (1) seseleh tetuek konotatif sane kasaihang antuk kahanan jagat Baline, indik kawentenan lan tantangan sane wenten ring krama Bali sajeroning kawentenan panglimbak aab, (2) seseleh tetuek denotatif sane munggah ring kamus basa Bali-Indonesia. Tetuek konotatif ring lirik-lirik gending rare Made Cenik ngerefleksiang kawentenan lan tantangan sane wenten ring krama Bali sajeroning kawentenan panglimbak aab.